كلام ترابلة

زراعة حب البطيخ (التسالي)

في الفترة الأخيرة انتشرت جداً زراعة حب البطيخ في جزيرتنا الحبيبة كزراعة مطرية رغم انه كان منتج رئيسي في كردفان وبعض اجزاء دارفور  على اعتبار انه منتج سريع النضج وينمو حتى في موسم الامطار القصير.

ويمكن التغير المناخي وقصر موسم الامطار  والهشاشة البيئية الحصلت في بعض مناطق الجزيرة خاصة منطقة البطانة.

بالاضافة للعائد المادي المجزي كل ده شجع المزارعين في مناطق الزراعة المطرية على زراعة حب البطيخ على حساب مساحات كانت بتتزرع  ذرة رفيعة.

عموماً في  السودان في نوعين من التسالي  واحد جامبو حبة كبيرة ويزرع في القضارف وطوكر والحواتة على ضفاف نهر الرهد والدندر على ضفاف نهر الدندر والنيل الأزرق والدالي والمزموم  وفي بعض المناطق في  سنار والنيل الأزرق والقضارف  في الميعات  وكمان في وديان البطانة  ودي بتعتمد على الامطار .

النوع التاني حبة صغيرة يزرع فى إقليم كردفان و إقليم دارفور بشكل كبير وكل الزراعة في الاقليمين ديل تعتمد على الأمطار.

طيب عرفنا انه عنده عائد مادي مجزي…. فوائده الغذائية شنو ؟؟؟؟ رغم أننا بنستخدم  التسالي الا انه معرفتنا بالقيمة الغذائية للتسالي وفوائده و قيمتة الغذائية ما كتيرة.

يالا يا سيدي التسالي  يعتبر من المصادر الجيدة للبروتين البروتين تساوي درجة البروتين البنلقاها في اللحوم والأسماك. و الأملاح و الحديد وكمان بيحتوي على الزنك و المنجنيز و الماغنسيوم و الفوسفور و النحاس و البوتاسيوم والبوتاسيوم ده بيضبط الضغط في الدم لكن على شرط ما يكون التسالي مملح.

وطبعاً بيحتوي كميات عالية من الدهون , لكنها دهون من النوع الجيد بمعنى ما بيؤثر على القلب و الشرايين الا أنه يتسبب في زيادة الوزن و هو مفيد للبشرة و الشعر كما يعتبر من الاشياء البتساعد في الوقاية من الأمراض السرطانية برضو  بيحتوي على حمض الفوليك عشان كده التسالي  من الأشياء المفيدة للحامل لانه  حمض الفوليك ضروري للجنين.

ما كده بس حب البطيخ مطلوب للتصدير لانه   بيستخدم في صناعة بعض مستحضرات التجميل زي الكريمات والشامبوهات  وبعض الصناعات الغذائية زي   صناعة حلاوة طحنية وغيره من المنتجات الغذائية.

كيف تتم زراعة حب البطيخ او اللب زي ما بيقولوا اخوانا المصريين  ؟
في الزراعات المروية حرث الارض حرثتين او ثلاث للعمل على تقليبها بشكل جيد و التخلص من جذور او بقايا النباتات السابقة ثم العمل على تزحبف تسوية الأرض.

طبعا ده  زي الصعيد او سنار القضارف لكن في اراضي هشة بيئيا زي اراضي كردفان ممنوع  استخدام حراثة مفرطة  اصلاً فانت لو كنت ح تزرع  التسالي في القضارف ولا سنار اوالنيل الأزرق ح تحتاج  تراكتور وزراعة هوائية(بلانتر) دسك ٢٤ صاجة  اما هلنا في كردفان ودارفور بيستعملوا ادوات تحافظ على الطبقة الخارجية من التربة.

عشان كده بيستعملوا  الخرباشة في حراثة التربة بنعمل الحفر بحيث تكون المسافة بين الحفرة و التانية من 25 الى 50 سم .

في  العادة تتم زراعة حب البطيخ عندنا في السودان دونما استعمال يذكر للاسمدة يعني انتاجنا عضوي لحد كبير.

لكن المصريين  بيزرعوه  وبيستعملوا جرعات مقدرة من الاسمدة لكن للامانة حجم الإنتاج بالنسبة لوحدة المساحة عندهم عالية جداً …بس احنا فعلا ما محتاجين لزيادة تكاليف طالما عائد زراعته مجزي جداً ومراعي للبيئة.

في حيلة بعملوها المزارعين الفالحين وهي  زراعة بعض بذور الكوسا و زهرة  الشمس عشان تعمل  على جذب الحشرات للزيادة من نسبة العقد عند طريق زيادة نسبة التلقيح   فترة الزراعة ما بتفوت ليها 100 يوم.

تبدأ الزراعة المطرية للمحصول ده  في دارفور وكردفان  او حتى عندنا في الجزيرة  في مناطق الزراعة المطرية  في منتصف شهر يوليو  لى نهاية أغسطس حسب كمية الأمطار في كل منطقة.

اما في القضارف والنيل الأزرق وسنار ووديان البطانة يزرع شتوي في نهاية سبتمبر إلى اول نوفمبر.
وطبعا ح تحتاج لي تريلة و حصادة (بجانة)  سيارة دفع رباعي. لدواعي الحصاد.

إن شاء خيركم وافي وحصادكم كافي
والله يعشيكم ويطرح البركة فيكم