كلام ترابلة

 

 

تحضير الأرض للموسم الشتوي

اخوي المزارع الموسم الشتوي خلااااص على الأبواب قبل ما تبدى جدد النية الطيبة نية عمار الأرض وسترة الحال والتوكل علي رب العباد وكتر الاستغفار والصلاة على النبي والنية زاملة سيدها.

ونمشي على تحضير الواطة …..ودي اهم عملية على الإطلاق في الزراعة بعد اختيار البذور المعتمدة والموثوق منها.

اها دحين تيرابم ده اخوي المزارع كما لقى مهد مريح مفكك ومستوي تيرابك زاتو بيضيع سداح مداح والري ما ح يكون سليم وتتعرض زراعتك للحشائش والافات بالنالي انتاجك ح يكون قليل …..شفت كيف الحراتة وتحضير الارض مهمة
دحين اخوي المزاراع.

واولاً بالتبادي طالما نويت تحرث أرضك الحراتة تكون تحت عينك ما تتكل علي زول يحرث ليك أو على عامل التركتر امشي أرضك اديها نظرة عاين لي ارتفاع الأرض و انخفاضها شوف الشجيرات والحشائش القايمة فيها شيل طوريتك جود أرضك ونضفها.

اول شيء بعد داك استعين بعامل التركتر توريهو انك عاوز تحرت الأرض دي من جوه لي بره بمعني يوقف التركتر في نص الحواشة ويبدأ الحراتة ويدور حولها كمان في طريقة حراثة الأرض بالجنبات بمعني يحرث محاوط الأرض من جنباتها لامن يصل مركزها بحيث تحصل في النهاية على خلخلة للتربة وتقطيع وتكسير الكتل تربة ناعمة مفككة ومستوية عشان الحراتة دي هو اس وأساس الري السليم عشان لا سمح الله ما محصولك ما يحصل ليه غرق لا عطش لا هدر للمويه.

المحراث بكون حسب نوع الأرض بمعني ما شرط دسك مرات بيحتاج محراث مطرحي مرات خلخال مرات المحراث الحفار تحت التربة أو الطراد ده كله طبعا حسب نوع التربة ونوع المحصول
في محاصيل جذورها عميقة محاصيل جذوره سطحية وكده وده طبعاً كله التحضير الاولي .. واهم شي طبعا التحضير الأولى ده أس وأساس الزراعة.

فاختى التحضير العشوائي ولابد تختار عامل حراثة مدرب وعاااارف وبتمنى من جهات الاختصاص في البلد دي التركيز على تدريب عمال وسائقي التركترات على تحضير التربة.

فاختار ليك عامل يكون خبير عشان حراته ما تكون فيها جزر ما محروتة ومفطفطة وعالي واطي وتربة مقلوزة تدينا ري في شكل زقزاق محتاجين مهد مستوي ومفكك.

بعد ده مفروض نفكر في التسميد وطبعا ممكن ندي ماروق مخمر والماروق الممكن تديهو ملاسر من غير تخمير هو ماروق الدواجن أو الحمير اعزكم الله ديل بس ممكن اضافتهم مباشر .. غير كده لابد من التخمير عشان نطفي حرارة السماد الطبيعي ونقتل بذور الحشائش والديدان ومسببات المرض.

وبي كده نكون يسرنا المغذيات في التربة للنبات وحسنا مسامية التربة بعد أضفنا تسميد الأساس ده تكون
الخطوة البعديها هي التسريب
ممكن طبعا التسريب كان يدوي أو بالزراعة
اتمنى ليكم موسم مبارك وحصاد وافر وخير زاخر
الله يعشيكم ويطرح البركة فيكم