كلامةترابلة

في سؤال بتساءلوه معظم المزراعين   بسالوا نسمد متين ؟
الاجابه باختصار اول ما  النبات بدأ يمتص الماء وبدأت عملية التمثيل الضوئي . طوالي ممكن …..في ناس بتضع برنامج وتلتزم بيه  الأفضل يا اخوي أنك تفهم التسميد اكتر من تخت  برامج تسميد . لأنو الالتزام ببرنامج تسميدي بخليك زي البتنفذ في تعليمات ما مركز مع الوضع الحالي للنبات …….بمعنى عاين لي محصولك لي اوراقه …. الورق بتديك خبر عن احتياج النبات  ولو نباتك ما محتاج وصحيح ومفرهد ما في داعي لزيادة المصاريف.

والأفضل يا اخوي   تقول سماد سائل من سماد ورقي لان الاسمده الغالبيه فيها  ممكن تتسمد ورقي حتى اليوريا.
والافيد للنبات التسميد الأرضي لانو دا الاصل . واظن واضح في اي قارورة سماد سائل بتلقي الجرعة بالورقي واحد لتر للفدان للرش الورقي وخمسه لتر للفدان للرش الأرضي لان النبات بالجزور بيمتص افضل وما معرض للخطوره زي ماهو في الورقي وده  لأن تاثير المحتوى الملحي للسماد بكون واضح في الأوراق لو زادت الجرعه

اخوي المزارع البياض الدقيقي ثقيل وإذا ما عالجته من البداية ح يسبب ليك اشكال كبير .
الابد من  تقليم الأوراق المصابة وبعدها تطلعها بره المزرعة ورش مبيد جيد للبياض الدقيقي طبعا في اسماء كتيرة لكن أنا ما اعمل إعلان للشركات .
المهم من الآخر  اشتري المبيد من شركة محترمة وما تسترخص .

ناس  الطماطم  الخريفية انتوا مزارعين شطار والله  طبعا انتوا عارفين واسياد العرفة زاتو انه   من اهم امراض الخريف (الندى)  التبقع البكتيري   الندي ده   سببو  الأساسي  ارتفاع الرطوبة في الجو ومعاها  كمان ارتفاع درجة الحرارة  عشان كدة من اهم طرق الوقاية منو. كسر واحد منهم  ..والموضوع دة صعب … طيب نعمل شنووو ؟
تعال نوريك .
اولاً قلل من الري حال توقع الامطار
ثانيا اعزق الارض باستمرار كندتك من كتفك ما تنزل .
ثالثاً رش مركبات نحاسية  ومضادات حيوية وراقب باستمرار
اخوي المزارع كلنا جنود للوطن …..في جندي بيحمل السلاح وفي جندي بيحمل الطورية …..انتوا حنود الإنتاج الاخضر …و ح تنتصروا بإذن الله
الله يعشيكم ويطرح البركة فيكم