كلام ترابلة

دودة ثمار الطماطم

أهلي الترابلة الكلام كل السلام والاحترام التتتام لمزارع بلادي الهمام
خلونا نتكلم المرة دي عن ٱفة خطيرة جدا بتصيب ثمار الطماطم …وهي دودة ثمار الطماطم

يلا دودة ثمار الطماطم دي هي في الأساس اصلا دودة اللوز الافريقية لما تجي الطماطم بنسميها دودة ثمار الطماطم ….الحشرة دي بتنتمي لي رتبة حرشفيات الاجنحة يعني الفراشات وابو الدقيق ديل اهلها وناسها والحشرة دي نشاطها ليلي وبتتغذي على رحيق الازهار بواسطة فمها الخرطومي وهي بتنتشر انتشار واسع في بلدان العالم في كتير من الدول الافريقية والدول الاسيوية زي الهند وفي استراليا ونيوزلندا واوربا كمان ….عندنا هنا في السودان بتنتشر في المشاريع المروية يمكن لوجود العوائل ليها زي محصول القطن ….يلا الضرر الاقتصادي للحشرة دي بتسببه اليرقة اليرقة بتمثل خطورة كبيرة على الثمار وبتنقل من ثمرة للتانية لغاية ما تعم كل المحصول للاسف وهي طبعا ببتغذي على لب الثمرة فتقوم بثقب الثمرة بالتالي تصبح الثمرة معرضة للامراض بسبب تعرضها لدخول البكتريا والاحياء الدقيقة ومسببات الامراض الاخرى وبالتالي يحصل تعفن في الثمرة وبالتالي يصبح الضرر نوعي وكمي وطبعا النوع والشكل للثمرة مهم جدا للتسويق ولاقبال المستهلك على الشراء خاصة بالنسبة للطماطم
بالنسبة لدورة حياة الافة دي تبدا بالحشرة الكاملة (ابو الدقيق ) بتضع البيض في وقت متزامن مع النمو الثمري للطماطم وممكن تضع حوالي 300او 400 وقد تصل ل1000 بيضة واليرقات بتطلع من البيض اليرقات بعد يومين تلاتة بس والطور اليرقي ده زااانو عندو حوالي ستة اطوار يرقية تمتد الاطوار دي من 18_25 يوم وبتتميز اليرقات بالافتراس يعني سبحان الله ممكن تقتل بعضها وده من رحمة ربنا بعدها طور الشرنقة داخل التربة وده بيمتد حوالي 8_12 يوم بعد الحشرة الكاملة …وطبعا يمكن وجود.الحشرة طول العام طالما توفرت العوائل
طيب كيف نكافح الٱفة دي ؟!

اول طرق المكافحة هوالحراثة الجيدة وقلب التربة لتعريض طور الشرنقة او العذراءلاشعة الشمس المباشرة وكمان تعريضها للاعداء والمفترسات الطبيعية وبكده يتم القضاء عليها
وتاني ثنيت باانبي محمد ….تاني مكافحة الحشائش والعوائل للافة عشان ما تبقى مصدر لانتشار الافة
ثالتا في مفترسات واعداء طبيعية لبيوض الافة دي زي طفيل التراكوجراما ده بيتطفل على البيض
وطبعا اخر سبل المكافحة اللممكن نلجا ليها هي المكافحة الكيميائية عن طريق المبيدات اهم المبيدات الموصى بيها الملاثيون والكافيل ودانيتول وغيرها ….لكن اخوي المزارع لو رشيت مبيد لااابد عليك تراعي فترة الامان عند الحصاد

ربنا يكفينا شر الافات والمبيدات ويخضر ضراعكم ويكتر وساعكم
والله يعشيكم ويطرح البركة فيكم