كلام ترابلة

تنسيق الحدائق منزلية

إذا كنت فكرت قبل كده في تنسيق حدائق منزلية فده وقت مناسب خاصة في ظل القلق والإضطراب النفسي اللي فرضته علينا الحرب ….ممكن تقول وده وقته؟ …ايوه هو ده وقته بالضبط … كتير من الناس قاعدين في البيت( زي حلاتي ) بدل نقعد نفكر في الحرب خلونا نعيش يومنا (فاعمل لدنياك كانك تعيش ابداً ).

طيب احياناً لما تحاول تعمل ليك حديقة بتلقى الخيارات قدامك مربكة الى حد ما بمعنى شنو النباتات المناسبة وكيف حا يكون تنسيقها هل نعمل دوائر مثلتات مربعات الخطوط والممرات تكون مستقيمة ولا منحنية طيب الملحقات زي المقاعد وأحواض الطيور ودي مهمة عشان تجذب ليك الطيور البرية وتدي حيوية لحديقتك وده كله بيعتمد على المساحة العندك.

اول بالتبادي تقعد تفكر في احتياجات تنسيق حديقة المنزلية وتصوراتك انت للحديقة …التخطيط ممكن يقلل كتير من تكاليف إنشاء الحديقة لأنك ممكن تلقى أنه معظم الاحتياجات دي عندك بالفعل في البيت طبعا اهم حاجة توفر خراطيم المويه والمرشات.

حسب التخطيط ده حا تضع قائمة باحتياجاتك …واكيد حا تضع في بالك مساحة للعب الأطفال لو عندك أطفال.

هل حا تحتاج زراعة خضار ؟ في وضعنا الحالي اهم حاجة هي زراعة خضار في البداية نعمل رسم كروكي ونضع في الرسمة أفكارنا وطبعاً لابد نضع في اختبارنا المناطق المشمسة والمناطق الفيها ظل ونخت في بالنا الرياح مثلاً عملنا الحديقة في الجهة الغربية من الحوش حا تحصل على الكتير من شمس النهارية لكن ده بيعني أنه وقت العشاء في شهر أغسطس مثلا ح يكون حار جداً.

ما تستعجل ابداً. وانت بتخطط لحديقتك لانه الاستعجال ممكن يوصلك لاختيارات على المدى الطويلة قد لا تصلح أخد وقتك واستمتع بالعملية.

ممكن تبدأ بحوض صغير من الازهار تشتغل علبه ساعة ساعتين لما يكون عندك وقت فراغ و ابدا ما تقلق ح تقدر تملأ كل فراغات حديقتك وبدل حوض الازهار ممكن يكون حوض جرجير او رجلة.

وفي كل تصميم لابد من نقطة مركزية أو حتى سلسلة من النقاط المحورية، ممكن النقطة المحورية تكون نافورة أو شجيرة مذهلة زي السايكس أو حتى شجرة ليمون أو مانجو أو سلسلة من الشجيرات، ولابد تركز على التدرج والانسجام لانه التدرج والتناغم حا يدي حديقتك مظهر متماسك.

ولابد تكون في اختلافات وتباينات في الحجم والشكل واللون بمعنى وجود نباتات طويلة مقابل المبنى أو في الجزء الخلفي من حوض الأزهار أو في الممرات لابد من إيجاد توازن بين التكرار والعناصر الجديدة. بحيث يدينا التكرار إحساس بالتماسك لكن ما يكون تكرار ممل ورتيب .

عموماً خليك مرن في التصميم وخليك منفتح على اجراء التغير في كل مرة استخدم النباتات الحولية والمعمرة الصغيرة حول النباتات الكبيرة الممكن تحتاج لوقت للنمو والملء.

وكمان يمكنك دائماً قلعها ونقلها لمكان تاني اذا أدركت أنها في المكان الخطأ.

ويمكن استخدام النباتات بعدة طرق فالنباتات ممكن تزودك بالفواكه والخضروات الطازجة واللذيذة ، والمناظر الجميلة ، والروائح الجميلة والكثير الكتير وكمان ممكن تستعمل نباتات حديقتك كسور وحواجز داخلية لتقسيم وفصل مناطق داخل الحوش .

وإكيد حا تضع في اعتبارك مدى تباعد النباتات عن بعضها البعض، وكيف ح يتم وضع النباتات في طبقات أو متداخلة (يتم استخدام النباتات الكبيرة بشكل عام خلف النباتات الصغيرة).

طبعاً يا جماعة تصميم حديقة ده فن يعني الحديقة ما ح تكون نباتات بس لا طبعاً فيها كتير من الجماليات بمعنى حا يتيح ليك استخدام النباتات الفريدة أو الهياكل المميزة أو زخارف الحديقة إبراز منطقة معينة من اللاند سكيب.

عموماً انتبه للتفاصيل والاختلاف والتجانس بين النباتات و الزخارف بل مرات حتى الحصى ممكن يكون عنده جمال في تفاصيل حديقتك وما تفكر بس في المرئيات .

خت في الاعتبار روائح النباتات …فكر في الوقت البتتفتح فيه الأزهار وتفوح رائحتها ، وكمان شنو هي الروائح البتكمل بعضها في الحديقة. (قلت ليك ذوق وفن ).

 

واسمحوا لي من المنبر وعلى سيرة الحدائق المنزلية ده احي من يستحق التحية الزملاء في إدارة الإرشاد ونقل التقانة بالإدارة العامة للزراعة بوزارة الانتاج والموارد الاقتصادية هؤلاء العاملون بصمت ودونما ضجيج لابد من الثناء على جهودهم الجبارة في التشجيع على الزراعة المنزلية وإقامة الحدائق المنزلية والجباريك التحية للزميلة امل نصر الدين وجميع أركان سلمها كل الزملاء في إدارة الإرشاد والتحية لقائدة الركب د عرفة محمود
والله يعشيكم ويطرح البركة فيكم