كلام ترابلة

إن فاتك زرع هاتور .. أصبر لما السنة تدور

شهر هاتور هو الشهر الثالث من السنة القبطية .. يبدا في 10 نوفمبر/ وينتهي في 9 ديسمبر
واسم الشهر بينسب لإلهة الجمال والخصب الفرعونية “حت حُر” وده بيوضح مدى تأثر أهلنا في الشمالية بالحضارة الفرعونية
والمثل معناه إنو دي آخر فرصة العام السنة لزراعة القمح .. واللي ما لحقها يستنى للسنة الجاية .

اخوي مزارع القمح، عجل بزراعة القمح واحرص انك ما تتأخر عن نهاية هاتور( شهر حداشر ) تحصل على إنتاجية عالية دحين الوكت ملا تب انكرب
اخوي مزارع المحاصيل الشتوية خاصة القمح ارفع تقانت تمااام.

طلع رباطاتك تمام وماتنسى الحراثة الجيدة واختى العالي واطي مهد جيد ومستوي ده اساس الري الجيد واهم حاجة تصريف الموية الزايدة احرص واطاتك ما تغرق….امسك مويتك براك وخلي عينك نجيضة ..اسقي رباط رياط وقصة قصة.

وابقى عشرة على الشلخ والرقاعة وما تفوت القش والقش ده ممكن تتفادى شره لو استخدمت من البداية تقاوي نضيفة من مصدر موثوق…برضو عمل التروية قبل الزراعة ده اساسي في مكافحة القش زي العدار والنجيلة.

وقبل ده كله الحرص على أتباع الدورة الزراعية عشان ما تزرع نفس المحصول في نفس الواطة كل سنة وأفضل دورة زراعية البكون فيها محصول بقولي زي الفول ده بغذي الأرض ويحسن خصوبتها.

في مبيدات الحشائش سواء لرفيعات الأوراق ودي دواها كتير منها زي بوما (puma ) أو تريدوك (Tredok)…معظم الجرعة بتتراوح بين 420…ل 435..سم مكعب للفدان
بالنسبة لعريضات الأوراق.

يستخد ال 2.4D باسمائه التجارية المختلفة والجرعة تتراوح بين 830 سم مكعب ل لواحد لتر للفدان
لما يكون الحقل فيهو خليط من رفيعة وعريضات الاوراق ممكن نخلط مبيد ال2,4D ومبيد البوما بنسبة 560سم مكعب ل300سم مكعب.

أو مبيد ال ال2,4D والتوبك بنسبة 830 سم مكعب ل420 سم مكعب للفدان
والرش اخوي المزارع بكون بعد 3-4 أسابيع من الزراعة

طبعاً أخوي مزارع القمح المفروض انك بديت التحضير بي حرتة خريفية بالطراد في نص شهر تانية (أغسطس) وعقبتها بي حرتة تانية بالطراد بعدها مفروض تكون استخدمت الدسك هرو ولأنو جذور القمح سطحية فهو ما بيحتاج في غالب الأحيان لتحضير عميق.
تشتت في واطاتك شوال داب 50 كيلوجرام للفدان.

والتقاوى تكلفك 60 كيلوجرام للفدان ولااابد تكون معفرة بالمعفرات الحشرية والفطرية زي القاوشو و الجزمو وطبعاً يستحسن استخدام السطارة وممكن استخدام الدسك العريض أو لو واطاتك ما مستوية شتت التيراب وبعدها مرر المشط.
وممكن تستخدم الطراد بعد تفك الإجنحة عشان تسرب سراب خفيف.

أفضل وقت للرية الأولة في نص شهر حداشر
اخوي مزارع الخضر
لو خدارك عقد اسأل من الكالسيوم في اسبوع العقد وبعدو البوتاسيوم ..بصلح الخدار وعليك الله ما تكتر البوتاسيوم ده بسموهو المطلط لأنو بكبر الخدار سمي الله وانت زول الله واعرف اخوي المزارع الملح قبل الموية كعب
اخوي المزارع نرجع للدواء المبيدات.

رش الدواء ده مدرسة براهو ..لابد تعرف الدواء ده ما دواء ده سم عديييل لو ما استخدمته صاح بكتل الطير والبشر اعمل حسابك وابعد الوليدات والبهايم اثناء الرش..وما ترش إلا لما يكون الرش ضروري وما ترش جداول المويه ….وغطي المحصول اثناء الرش وما تفطفط.

قبل ما ترش تلبس كمامة وطاقية وغطي رجليك والبس جونتات زي الدكاترة وماتنسى النضارة
احذر تتغش وتشتري مبيد مغشوش وماتسترخص
بعد ما ترش ماتخش طوالي اديها يومين تلاتة.

بعد تحرق العلب الفاضية تغسل ملابس الرش وتستحمى سمممح
الله يكفينا شر الآفات والمبيدات والله يعشيكم ويطرح البركة فيكم